Тауарларға арналған ілеспе жүкқұжаттар: нені білу керек?

Қандай тауарларға рәсімделеді?

Қарағанды облысы бойынша Мемлекеттік кірістер департаменті 2023 жылғы 1 сәуірден бастап электрондық шот-фактуралардың ақпараттық жүйесінде (ЭШФ АЖ) тауарларға ілеспе жүкқұжаттарды (ТІЖ) мына тауар түрлеріне рәсімдеу міндетті екенін еске салады:

- виртуалды қойманы қолдана отырып, мұнай өнімдері, алкоголь өнімдері және тауарларды қадағалау тетігі туралы келісімге сәйкес қадағалануға жататын тауарлар бойынша (тоңазытқыштар, мұздатқыштар - СЭҚ ТН 11 коды);

- виртуалды қойманы қолданбай, ЕАЭО шеңберінде тауарларды әкелу/әкету (барлық тауарлар) бойынша.

Осылайша, Қазақстан аумағында тауарларды сату кезінде ТІЖ-ді міндетті түрде рәсімдеу тек 3 тауар санаты бойынша көзделген. Қалған тауарлар бойынша ерікті негізде жүзеге асырылады.

Өнім беруші ҚР-ның аумағына тауарларды әкелген кезде алушы ТІЖ-ды электрондық нысанда ресімдейді.

Қандай мерзімдер белгіленген?

ТІЖ–ді алушы кез келген көлік түрі арқылы – 20 (жиырма) жұмыс күні ішінде, көлікті пайдаланбай-10 (он) күнтізбелік күн ішінде тауарды жеткізу (тасымалдау) кезінде растайды не қабылдамайды.

Білу маңызды

ТІЖ тауарлардың айналымын бақылау қамтамасыз етілетін тауардың тасымалдануы мен өткізілуін сүйемелдейтін құжат.

ТІЖ растау алдында тауарды алушы ТІЖ-де көрсетілген деректердің дұрыстығын салыстырып тексеруі, содан кейін ЭЦҚ-ға қол қою арқылы көрсетілген мәліметтердің сәйкестігін растауы тиіс.

Мәліметтер расталғанға дейін сәйкес келмеген жағдайда, мұндай ТІЖ-ды қабылдамау керек.

Алушы ТІЖ-ді қабылдамаған кезде жеткізуші түзетілген ТІЖ-ді 3 жұмыс күн ішінде осындай түзетілген ТІЖ негізінде түзетілген ЭШФ-ны жазып бере отырып, ресімдеуге мүмкіндігі бар.

ТІЖ негізінде жазылған ЭШФ автоматты түрде толтырылады. Сандық сипаттамалар бойынша деректерді қоспағанда, ТІЖ-де және ЭШФ-да көрсетілетін тауарлар бойынша деректер бірдей болуы тиіс.

Сұрақтар туындаса қайда хабарласу керек?

ЭШФ АЖ дұрыс жұмыс істеу үшін МКК сілтемесі бойынша ЭШФ АЖ Пайдаланушы нұсқаулығын пайдалануды ұсынамыз https://kgd.gov.kz/ru/content/dokumenty-po-esf-1.

Техникалық сұрақтар туындаған жағдайда esfsd@kgd.minfin.gov.kz электронды мекенжайына, сондай-ақ 8-7172-72-78-72 телефон нөмірі бойынша ЭШФ АЖ қолдау қызметіне хабарласуға болады.